جادجيتولوجي مصر

فريق gadgetology بيوصفوا نفسهم إنهم شوية ناس عندها شغف حقيقي بكل جهاز واختراع جديد وهدفهم توصيل الأجهزة والاختراعات الرائعة دي لكل الناس بأسعار معقولة. وبأمانة موقع gadgetology جذاب جدًا ولما تدخله هتحتار تشتري ايه ولا ايه لأن كل المنتجات هناك حلوة اوي ومثيرة للاهتمام جدًا. صعب نصنف الموقع في فئة معينة لأنه بيبيع حاجات غريبة بس روشة برده يعني مثلًا ورق تواليت بينور في الضلمة أو باور بانك في شكل كريدت كارد ورباط جزم بينور في الضلمة وماج على شكل نينجا وحاجات كتير كده غريبة جدًا. بص هو صعب نصنف الموقع وعشان كده لازم تزوره بنفسك. فريق gadgetology بيجيب المنتجات من بلاد كتير اوي عشان خاطر زباينهم فهتلاقي هناك منتجات من بريطانيا وأسبانيا وهولندا والسويد وبولندا وفرنسا وأيرلندا واليابان وجنوب أفريقيا والمكسيك وأمريكا وأستراليا والصين وهونج كونج. الموقع في الفترة الحالية مش بييبع بشكل مباشر وده لأن لسه فريق gadgetology بيكونوا المخزن بتاعهم ولكن تقدر تعمل طلب مسبق لأي منتج عجبك وبمجرد وصول وتوافر المنتج هتكون أول واحد تعرف. ولو كانت طلباتك أكتر من 500 جنيه هتاخد التوصيل ببلاش. الدفع عند الاستلام هو اختيار الدفع المتوافر حاليًا. توصيل الطلبات بياخد من يومين لتلات أيام والتوصيل بيكلف 50 جنيه. لو مش راضي عن المنتجات بشكل تام تقدر ترجعها بشرط ميكونش فات عليها أكتر من 24 ساعة. المنتجات على الموقع ليها صورة واتنين وكل صورة تقدر تشوفها بوضوح وكمان تقرا الوصف التفصيلي ليها وبعض المنتجات ليها كمان فيديوهات إعلانية على قناة gadgetology على يوتيوب. لما تزور الموقع مرة هتزوره مرة وتانية وتالتة مع صحابك كلهم لأن الموقع روش جدًا وعشان تكون على معرفة بآخر الأخبار والمنتجات الجديدة على الموقع تقدر تتابع gadgetology على فيسبوك أو تشترك في النشرة البريدية.