جيك شوب

جيك شوب هو اول موقع بيقدم خدمة الطباعة على حسب الطلب في مصر. جيك شوب بدأوا في مصر سنة 2013. وهما بيطبعوا على أي حاجة سواء تيشرتات أو هوديز أو كرافتات أو حتى لعب البازل وماجات وازايز المياه. المميز في جيك شوب مش بس انهم بيطبعوا على حسب الطلب وعلى أي حاجة لكن كمان إن الزبون هو اللي بيختار التصميم اللي عاوزه. أول خطوة هي انك تدخل على geeqshop.com وتختار نوع المنتج اللي عاوز يكون عليه الطباعة وبعدين تضيف عليه التصميم اللي عاجبك. والتصميم ممكن يكون صورة أو نص ترفعها من عندك على الكمبيوتر. بعد ما تعمل الطلب ب 24 ساعة هيتبعت لك نموذج للطلب وهيحتاج تأكيد منك إن هو ده الشكل اللي عاوزه. ولما تأكد الطلب هيوصل لك بعدها بحوالي 3 أو 5 ايام عمل. خدمة التوصيل بتكلف 25 جنيه لو مكانك جوا القاهرة لو كان طلبك أقل من 50 جنيه. لو طلبك أكتر من 49 جنيه التوصيل هيكلف 10 جنيه. لسه الدفع في جيك شوب عند الاستلام لكنهم شغالين على توفير خدمة الدفع أونلاين. ولحد دلوقتى برده بيوصلوا جوا القاهرة بس. كمان مع توصيل الطلب هيوصلك فاتورة شراء. وفيه كمان خدمة ارجاع للمنتج لو مش عاجبك لمدة 7 أيام وده بس في حالة المنتجات الجاهزة لكن لو كان التصميم حسب الطلب فمينفعش أصلا ترجع المنتج. جيك شوب بيخدموا الأشخاص والشركات وبيوفروا عروض كويسة جدا. جيك شوب فكرة رائعة للهدايا المميزة أو لو عاوز تلبس تي شيرت عليه شعار لفريقك المفضل.