مخبز مونجينيز

كلنا عارفين مخبز وحلواني مونجيني لكن اللي متعرفوش عن مونجيني إنه هندي الأصل وموجود في الهند من خلال 480 فرع في 12 مدينة هندية. اول ما دخلوا مصر كان سنة 1993 يعني عندهم خبرة بالسوق المصري فوق الـ 20 سنة ولحد النهارده ليهم أكثر من 60 فرع في المنصورة والقاهرة واسكندرية. الناس في مونجيني عندهم شغف بالحلويات والشيكولاتة وعندهم منتجات مش هتلاقيها عند حد تاني زي البوكيهات وسلات الشيكولاتة وده طبعًا غير الحلويات الشرقية والغربية والجاتوهات والبسكوت وكحك العيد. الموقع موجود باللغتين العربية والانجليزية، وأحلى حاجة في الموقع تقسيمته اللي هتساعدك توصل بسهولة لطلبك. ممكن تختار الحلويات على حسب المناسبة وعند مونجيني حلويات لكل المناسبات سواء عيد حب أو عيد أم أو رمضان أو حتى تورتة فرح. وكمان هم مبدعين جدًا في اللي بيعملوه فعملوا كمان عرض هدية كومبو فيه تورتة وهدية ممكن تكون دبدوب أو شيكولاتة وسعرها معقول جدًا. أما لو معجبكش أي حاجة من التورت اللي موجودة، ببساطة مونجيني كمان يقدر يعمل لك التورتة اللي على مزاجك وعنده تورت ثنائية الأبعاد أو ثلاثية الأبعاد واللي بتكون مثالية لأعياد الميلاد والحفلات عمومًا. وتحضير التورتات ده وتوصيلها بياخد حوالي 48 ساعة من تاريخ الطلب وتقدر تدفع للطلبات الأونلاين من خلال الفيزا أو الماستر كارد أو خدمة باي بال. الموقع مغري جدًا جدًا لأن مش بس صور الحلويات اللي عليه لكن كمان مونجيني بيكتب لك المكونات اللي داخله في تكوينها بشكل مغري جدًا هيقنعك تشتري الحاجة حتى لو مش محتاجها أوي وكمان بيوصف لك حجم التورت والأطعمة المتوفرة.