نسبريسّو

الموقع ده لمحبي القهوة الحقيقيين اللي بيقدروها بجد وميقدروش يستغنوا عنها. ونسبريسو طبعًا اسم عالمي في حتة القهوة دي بالذات. وكبسولات القهوة العبقرية بتاعتهم مش موجودة غير أونلانين أو في المحلات المحدودة بتاعتهم وعشان كده الطلب أونلاين هو الخيار الأمثل لو عاوز تستمع بكوباية قهوة تعدل مزاجك. أول ما تدخل على الموقع هتختار البلد التابع ليها واللغة المناسبة فياخدك الموقع للصفحة المناسبة. من على موقع نسبريسو مش بس تقدر تختار القهوة لكن كمان ماكينات القهوة والكوبايات واكسسوارات تانية كتير مهمة للي بيقدر القهوة. تقسيمات الموقع كالتالي: القهوة، الماكينات، الاكسسوارات، النادي، وحلول الأعمال. في قسم القهوة، 100 نوع ونوع من كبسولات القهوة المشهورة. وفيه فلتر بحث بيساعدك تلاقي نوع القهوة اللي بتحبه فبتختار مثلا قوة القهوة على تدريج من 1 لحد 13 وبعدين حجم الكوب وأخيرًا المواصفات العطرية زي إنها تكون متوازنة أو فاكهية. كبسولات القهوة مكتوب عليها سعرها والعلبة بتحتوي حوالي 10 كبسولات وفيه عرض إنك لو اشتريت 100 كبسولة هتاخد التوصيل ببلاش. قسم الماكينات فيه تشكيلة من الماكينات وأحدث الاصدارات وكمان كل فترة بيكون فيه خصومات على أسعارها والتوصيل دايمًا بيكون ببلاش لأي ماكينة قهوة تشتريها. كل الماكينات ليها وصف تفصيلي لمميزاتها ومواصفاتها التقنية وكمان طرق الدفع والتوصيل. الدفع عادة بيكون عند الاستلام وتقدر تستلم الماكينة في بوتيك من بتويكات نسبريسو أو تستلمها في البيت. وعشان تتسوق على الموقع مش ضروري تعمل حساب وممكن تتسوق كزائر. لما بتتعامل مع نسبريسو تقدر تبقى عضو في نادي أعضاء نسبريسو وده بيوفر لك خدمة خمس نجوم في جميع النواحي زي مثلًا إنك هتشترك في مجلة نسبريسوا وطلباتك هتوصل أسرع وغيرها من المزايا الكويسة جدًا.